Светскиот индекс на цената на храната се зголеми шести последователен месец во ноември, достигнувајќи го шестгодишниот максимум. Индикаторот го забележа најсилното месечно зголемување од јули 2012-та година, според податоците на Агенцијата за храна на ООН, цитирани од „Reuters“.
Индексот на цени на Организацијата за храна и земјоделство (ФАО) на Обединетите нации ги мери месечните промени во цената на корпата со производи, вклучувајќи житарици, маслодајни семиња, млечни производи, месо и шеќер. Во ноември индикаторот порасна за скоро 4 поени на ниво од 105 поени.
Организацијата со седиште во Рим вели дека глобалната берба на житни култури веројатно ќе достигне рекордни нивоа во 2020-та година, и покрај фактот дека ФАО малку ги намали своите претходни прогнози.
Како и да е, индексот на цените на житарките во агенцијата скокна за 2,5% во ноември во споредба со претходниот месец и сега е близу 20% над нивото од минатата година.
Една од главните причини за силниот раст на индексот на цените на храната е зголемувањето на цените на растителното масло – тие се зголемија за дури 14,4% на месечно ниво, главно, поради порастот на палминото масло како резултат на наглиот пад на глобалните резерви.
Просечните цени на шеќерот се зголемија во ноември за 3,3% на месечно ниво, поради стравувањата од дефицит во светското производство, бидејќи лошите временски услови влијаеја на изгледите за жетва во Европската унија, Русија и Тајланд.
Индексот на млечните производи се зголеми за 0,9% минатиот месец, достигнувајќи го речиси 18-месечниот максимум како резултат на повисоките цени на путерот и сирењето.
Индексот на месото исто така се зголеми во ноември за 0,9% на месечно ниво, со што се означи крајот на серијата од два последователни месеци на пад. Сепак, сè уште е за 13,7% пониско во споредба со ноември 2019-та година.
