AstraZeneca денес објави дека резултатите од прелиминарната анализа на клиничките испитувања на вакцината за коронавирус покажала дека вакцината е многу ефикасна, што беше примарна цел, додека не беа пријавени хоспитализации или тешки случаи кај учесниците кои ја примиле.
Тие наведуваат дека со вакцината, два различни режима на дозирање покажале ефикасност, од кои едниот се покажал како подобар. Еден режим на дозирање покажал ефикасност на вакцината од 90 проценти, кога 1222 AZD е дадена како половина доза, проследена со целосна доза со растојание од најмалку еден месец.
Вториот режим на дозирање покажало 62% ефикасност кога се дава во две полни дози, со растојание од најмалку еден месец. Немаше сериозни несакани ефекти поврзани со вакцината и AZD 1222 добро се поднесува во двата режима на дозирање, тврдат од компанијата.
Тие напоменуваат дека детална анализа на прелиминарните резултати ќе биде доставена за објавување во меѓународно медицинско списание.
AstraZeneca веднаш ќе подготви документација за доставување апликации за регистрација на вакцини до регулаторните тела низ целиот свет.
“Овие наоди покажуваат дека имаме ефикасна вакцина која ќе спаси многу животи. Ние откривме дека еден од нашите режими на дозирање може да биде околу 90 проценти ефикасен. Ако се користи овој режим на дозирање, повеќе луѓе би можеле да бидат вакцинирани со количините кои се планирани за снабдување на вакцината“, рече професорот Ендру Полард, главен истражувач на тимот за испитување на вакцини во Оксфорд.
Извршниот директор на AstraZeneca, Паскал Сориот изјави дека ефикасноста и безбедноста на вакцината е важна.
Тој додаде дека ќе има едноставен синџир на снабдување за вакцината и дека компанијата вети дека ќе работи без профит, и вакцината ќе им биде достапна на луѓето ширум светот испорачана во стотици милиони дози по одобрувањето.
Вакцината може да се чува, транспортира и ракува на температура од 2-8 степени Целзиусови, најмалку шест месеци, што овозможува лесна употреба во рамките на постојниот здравствен систем.
Дали вакцината AstraZeneca ќе се прима секоја година?
Научниците кои ја тестирале ефикасноста на експерименталната вакцина против Ковид-19 на компанијата AstraZeneca, рекле дека тие не може да бидат сигурни дали вирусот ќе мутира на таков начин што ќе биде потребна повторна вакцинација секоја година, но дека сега за сега се чини дека е малку веројатно.
„Сè уште не знаеме дали овој вирус ќе мутира“, им рече на новинарите директорот на групата за вакцини од Оксфорд, Ендру Полард, на брифингот, додавајќи дека за тоа сè уште нема докази, објави Ројтерс.
На прашањето дали вакцината, која покажала приближно 70 проценти ефикасност според испитувањата во фаза III, веројатно ќе обезбеди долгорочна заштита, Полард рече дека се оптимисти дека имунолошкиот одговор може да трае најмалку една година, но дека ќе биде потребно повеќе време за да може да се даде каква било потврда за издржливоста на вакцината.
Џонсон: Вакцината е фантастична вест, но треба да се провери
Утрово британскиот премиер Борис Џонсон оцени дека веста за новата, ефективна вакцина на компанијата AstraZeneca, развиена во соработка со Универзитетот во Оксфорд, е „фантастична“, но дека е потребно да се спроведат дополнителни проверки на нејзината безбедност.
„Претстојат дополнителни проверки за безбедноста на вакцините, но ова се фантастични резултати“, рече британскиот премиер, пренесе Ројтерс.
Хенкок: Велика Британија планира да започне вакцинација пред Божиќ
Обединетото Кралство ќе се обиде да започне вакцинација против Ковид-19 пред Божиќ, со масовна вакцинација на почетокот на следната година, а по Велигден се очекува враќање во нормален живот, објави британскиот министер за здравство, Мет Ханкок.
„Се надеваме дека ќе започнеме со вакцинирање следниот месец, масовни вакцинации од почетокот на следната година, во јануари, февруари и март, и се надеваме дека по Велигден, животот може да се врати во нормала“, рече Ханкок, пренесе Ројтерс.
Ханкок оцени дека веста за новата, ефективна вакцина на компанијата AstraZeneca, создадена во соработка со Универзитетот во Оксфорд, е одлична вест.
„Нарачавме 100 милиони дози и ако сè оди според планот, масовната вакцинација ќе започне следната година“, објави Ханкок, потврдувајќи дека ќе следат дополнителни безбедносни проверки на вакцината „AstraZeneca“ пред да се добие конечно одобрение за ставање во промет од релевантното регулаторно тело.
Коментари