Новите мерки за карантин што стапуваат на сила во Германија ќе ја чинат најсилната европска економија околу 19,3 милијарди евра, објави весникот Велт ам Зонтаг, повикувајќи се на пресметките на Берлинскиот институт за економски истражувања (DIW).
Според предвидувањата на DIW, угостителите може да загубат најмногу во текот на едномесечното затворање – околу 5,8 милијарди. Индустријата за забава, спортските и културните институции ќе изгубат 2,1 милијарди, второто „заклучување“ оваа година трговијата ќе ја чини 1,3 милијарди евра и индустријата 5,2 милијарди евра.
Се очекуваат загуби и во услужниот и логистичкиот сектор.
Сепак, DIW е убеден дека германската економија ќе започне да се опоравува следната година, но само под услов на ефикасна контрола на ширењето на коронавирусот.
Германската влада е подготвена да им обештети на компаниите за значителен дел од очекуваниот промет за ноември. За помалите компании, со најмногу 50 вработени, државата ќе обештети 50 проценти, а поголемите 70 проценти од прометот.
Канцеларката Ангела Меркел уверува дека властите нема да ја остават економијата во невоља и се договорија за мерки во вкупен износ до десет милијарди евра со цел да им се обезбеди финансиска поддршка.
Германија воведува нови ограничувања во јавниот живот најмалку еден месец, со цел да се потисне ширењето на коронавирусот.
Рестораните, баровите и другите угостителски објекти ќе бидат затворени, но тие ќе можат да продаваат храна и пијалоци за носење.
Фитнес-клубовите, салоните за тетовирање, базените, салоните за убавина и масажа, театрите, кината и концертните сали ќе престанат да работат. Сите натпревари во Бундеслигата ќе се одржат без публика во ноември.
За разлика од пролетниот карантин, градинките, училиштата, фризерите и продавниците ќе останат отворени, но подлежат на хигиенски и епидемиолошки мерки. Во хотелите ќе може да се преспие само во итни случаи, а не за туристички цели.
