Економијата на САД порасна за неверојатни 33,1% на годишно ниво во третиот квартал од 2020-та година, откако владата инјектираше повеќе од 3 трилиони долари за справување со пандемијата, поттикнувајќи ја внатрешната потрошувачка, објави „Reuters“.
Резултатите ги надминаа предвидувањата за скок од 31%, забележувајќи ја најбрзата стапка на раст од кога владата води статистика од 1947-ма година.
Растот е навистина зачудувачки по рекордниот пад од 31,4% во вториот квартал и сигнализира закрепнување на економијата од последниците од пандемијата.
Бројките за БДП-то, еден од последните големи економски показатели што излегоа пред претседателските избори следната недела, нема да ги излечат ефектите од пандемијата на коронавирусот толку лесно, бидејќи десетици милиони Американци се уште се невработени, а повеќе од 222.000 починаа.
Неколку дена пред изборите, претседателот Доналд Трамп, кој заостанува во повеќето национални анкети, веројатно ќе го искористи остриот скок на БДП-то во знак на закрепнување. Но производството во САД останува под своето ниво во четвртиот квартал од 2019-та година, факт што е скоро сигурно да го посочи демократскиот кандидат Џо Бајден.
Економистите анкетирани од „Reuters“ предвидуваат економски раст од 31% во кварталот јули-септември по рецесијата во февруари.
Владиниот пакет обезбеди спас за многу деловни субјекти и невработени, поддржувајќи ја внатрешната потрошувачка што доведе до пораст на БДП-то. Но, државното финансирање е исцрпено, бидејќи не се очекува договор за нов пакет мерки.
