Туристичкиот сектор е меѓу најпогодените од пандемијата на ковид-19 годинава, покажуваат податоците на „Евростат“. Во март и април, земјите во заедницата се затворија, а во април ноќевањата во земјите на ЕУ забележаа драматичен пад од 95% во споредба со април 2019-та година.
Генерално, во првата половина од 2020-та година, ноќевањата во ЕУ се намалиле за 60 проценти на годишно ниво – од 1,2 милијарди на 500 милиони. Падот е највидлив во земјите како што се Грција и Хрватска, кои главно се потпираат на туризмот за развој на својата економија. Во Грција, ноќевањата се намалиле за 90 проценти, а во Хрватска за скоро 80 проценти.
Спротивно на тоа, во Австрија, ноќевањата паднале за 39 проценти во првата половина од годината.
По јуни, има подобрување на состојбата, иако не толку значително. Во тоа време, земјите постепено почнаа да ги олабавуваат мерките, но сè уште имаше карантини за оние кои доаѓаат од поризичните земји, вклучително и за оние што се враќаат од одмор.
Тогаш домашниот туризам доаѓа на помош на секторот, според европската статистика. Во јули, домашниот туризам скоро се врати на нивоата од 2019-та година и забележа пад од 22% на годишно ниво. За споредба, ноќевањата регистрирани од странски државјани се за 64% помалку.
Во просек, ноќевањата во ЕУ во јули се намалиле за 42,7 проценти.
Меѓу најпогодените се Грција (-75,3%) и Малта (-74,2%), додека во Данска скоро се опорави бројот на ноќевања од 2019-та година – пад од само 3,5 проценти. Во Холандија, пак, бројот на ноќевања дури се зголемил за 3,5 проценти.
