Според кинескиот премиер Ли Кечијанг економскиот раст на Кина не смее да ја мине границата под седум проценти.
Кина: Растот не смее да биде под 7%
„Долната граница за економски раст е седум проценти и под неа не смееме да паднеме. Тој економски раст е неопходен за Кина да ја исполни својата цел за удвојување на бруто домашниот производ во периодот од 2010-та до 2020-та година“, истакнал Ли при обраќањето пред економските експерти и деловни луѓе.
Кина во последните неколку години стана втора најголема економска сила, но неодамна ја зголеми загриженоста во врска со нејзиниот раст кој е од клучно значење за владеачката Комунистичка партија за да го обезбеди ветениот просперитет.
Кинеската економија во периодот од април до јуни пораснала за 7.5 проценти на годишно ниво што е побавно во однос на 7.7 проценти во првото тромесечие и 7.9-те проценти од последниот квартал од 2012-та година.
Владата во Пекинг за оваа година како цел има поставено раст на БДП од 7.5 проценти.