За да се спречи ширењето на пандемијата ковид-19, земјите ширум светот презедоа разни ограничувачки мерки. Додека бројките за првиот квартал од 2020-та година веќе го покажуваат нивното значително влијание врз авионскиот транспорт, влијанието во вториот квартал е уште поголемо, според податоците на „Евростат“.
Иако Македонија не е една од земјите членки на ЕУ, го има забележано најголемиот пад според бројот на превезени патници или 100 проценти. Според податоците на „Евростат“ во вториот квартал од 2019-та кога од нашите два аеродроми биле превезени 602.715 патници, во 2020-та оваа бројка изнесува 2.738 или пад од 100 проценти. Во првиот квартал од 2020-та е забележана бројка од 383.117 превезени патници или пад од 16% во споредба со првиот квартал од 2019-та кога биле превезени 454.107 патници.
Во споредба со вториот квартал од 2019-та година, бројот на превезени патници се намали за повеќе од 96% во сите 19 земји-членки на ЕУ со достапни податоци во вториот квартал од 2020-та година – Данска, Германија, Естонија, Ирска, Шпанија, Франција, Хрватска, Италија, Кипар, Летонија, Литванија, Луксембург, Унгарија, Холандија, Австрија, Португалија, Словенија, Словачка и Финска.
Најголемо намалување на бројот на патници е забележано во Шпанија (-61,6 милиони патници, -99%), Германија (-59,1 милиони, -97%), Франција (-44,2 милиони, -97%), Италија (-42,6 милиони, -98%), Холандија (-20,9 милиони, -96%), Португалија (-15,0 милиони, -97%), Ирска (-10,3 милиони, – 98%), Австрија (-9,2 милиони, -98%) и Данска (-9,1 милиони, -97%).
Сите аеродроми во ЕУ со достапни податоци за втората половина од 2020-та година регистрираа драстичен пад на бројот на патници во споредба со втората половина од 2019-та година, со исклучок на неколку помали аеродроми.
