Белата куќа подготвува предлог мерки за поддршка на економијата во вредност од 1,8 трилиони долари.
Министерот за финансии Стивен Манучин се очекува да разговара за новиот предлог со спикерот на Претставничкиот дом Ненси Пелоси.
Предлогот на Белата куќа ја зголемува претходната понуда за околу 200 милијарди долари, но останува значително растојание во вкупната вредност на пакетот меѓу администрацијата и лидерите на демократите. Минатата недела, демократите усвоија пакет мерки за поддршка на економијата вреден 2,2 трилиони долари, скратена верзија на нивниот претходен предлог вреден 3,5 трилиони долари. Пред извесно време, Манучин предложи пакет мерки за 1,6 трилиони долари.
Двете страни, исто така, не се согласуваат околу содржината на пакетот, вклучително и помош за државите и локалните власти.
Секоја зделка ќе треба да ги надмине големите пречки за да биде прифатена пред изборите. Сенатот е фокусиран на потврдување на кандидатката за Врховниот суд, Ејми Кони Барет во следните недели. Покрај тоа, дури и ако администрацијата на Трамп и Пелоси се согласат, многу републиканци во Сенатот се спротивставуваат на нов голем пакет помош, што ќе го отежни брзото прифаќање на новиот договор.
Пелоси за „MSNBC“ изјави дека планира да го проучи целокупниот план за трошење на администрацијата и специфичните предложени политики.
„Чекаме неколку одговори на прашањата што ги имаме, и одговараме на некои од нивните прашања. Сè е во врска со употребениот јазик. Знаете дека ѓаволот и ангелите се наоѓаат во деталите. Особено, дел од проблемот е поврзан со парите, а дел – со политиката“, рече таа.
Советникот во Белата куќа, Лари Кудлоу, во петокот изјави дека Трамп одобри продолжување на ревидираниот предлог за стимулација, кој вклучува помош за мали бизниси и авиокомпании, како и чекови за домаќинствата.
Новиот предлог е уште една пресвртница во напнатата недела во која Трамп ги прекина разговорите, инсистираше на донесување на одделни закони, а потоа ја одобри неговата најголема понуда до денес за Пелоси. Не е јасно какви измени се дел од новиот предлог на Белата куќа, кој ќе одреди дали Трамп ќе може да постигне договор со Пелоси.
Претходно во петокот, лидерот на мнозинството во Сенатот, Мич Меконел, изјави дека не е јасно дали Конгресот може да прифати пакет помош за справување со ефектите на коронавирусот пред изборите, предизвикувајќи сомнежи за договор во следните недели. Републиканците бараат потврда од судијата Барет пред изборите, а усвојувањето на голем пакет законски мерки без едногласна поддршка може да го потроши времето на Сенатот.
Коментари