Европската комисија објави дека ќе издаде обврзници на ЕУ за инструметот „SURE“ од 100 милијарди евра во форма на социјални обврзници.
За таа цел, Комисијата усвои независна проценка на рамката за социјални обврзници. Целта е да им се даде доверба на инвеститорите дека мобилизираните средства ќе послужат за постигнување на вистинска социјална цел.
Алатката „SURE“ е создадена за да помогне во заштита на работните места. Финансиската поддршка ќе биде обезбедена во форма на заеми доделени по поволни услови од ЕУ на 17-те земји-членки.
Овие заеми ќе им помогнат на земјите-членки да ги покријат трошоците директно поврзани со финансирањето на националните режими на работа со скратено работно време и други слични мерки што ги воведоа како одговор на пандемијата, особено за самовработените. Инструментот „SURE“ исто така може да финансира некои здравствени мерки, особено на работното место, користени за да се обезбеди безбедно враќање на нормалната економска активност.
„Одлуката за издавање на обврзници на ЕУ под инструментот „SURE“ како социјални обврзници ќе предизвика пресврт на глобалниот пазар на социјални обврзници“, рече комесарот Јоханес Хан, одговорен за буџетот и администрацијата, цитиран од прес-службата на ЕК.
Собраните средства ќе бидат префрлени на земјите-кориснички во форма на заеми за да се покријат трошоците директно поврзани со финансирање на национални договори за работа со скратено работно време и други мерки како одговор на пандемијата.
За да се осигури дека средствата се користат за социјални цели, рамката за социјални обврзници заснована на „SURE“ регулатива бара од земјите-членки да известуваат за тоа како биле потрошени позајмените средства. Рамката, исто така, бара од земјите-членки да известуваат за социјалното влијание на обврзниците на ЕУ според инструментот „SURE“.
Врз основа на информациите во овие извештаи, Европската комисија ќе може да им покаже на инвеститорите дека обврзниците на ЕУ под инструментот „SURE“ се користени за финансирање на програми со позитивно социјално влијание.
Коментари