Без дистанца и маски, синоќа во угостителскиот објект „Мош“ во Скопје се одржа настап на српскиот пејач Владо Георгиев.
Директорот на Пазарниот инспекторат, Стојко Пауновски, во изјава за А1он вели дека минатата недела против истиот локал била поднесена кривична пријава.
Тој образложи дека не можат да ги затвораат објектите, бидејќи законски е предвидена само кривична пријава за непочитување на протоколите.
„Вечер во ‘Мош’, повторно настап ќе има Владо Георгиев, повторно ќе пуштам инспекција. Зборував со Комисијата за заразни болести, да се најде начин и полицијата да доаѓа со нас, за да ги казнуваме и луѓето. Луѓето не се свесни. Колку и да ги казнуваме операторите, тие ќе ја платат казната. Кога одат инспекторите им велат: ‘Треба да бидете седнати, не станати’, на што добиваат одговор: ‘Ти ќе ми кажеш мене, еве го столчето до мене, јас ќе си играм’. Тоа е крајно несвесно и некоректно. Операторите ги казнуваме и со по 4 илјади евра, но, некаде и кривичните пријави не помагаат. Јас не знам како им се исплаќа“, вели Пауновски.
Според најновиот извештај на Министерството за здравство, во изминатите 24 часа потврдени се рекордни 243 нови случаи на коронавирус.
Коментари