Големата инјекција на ликвидност на Европската централна банка (ЕЦБ) го зголемува износот на готовина во економијата на еврозоната, што веќе надминува 3 трилиони евра.
Финансиските институции го зголемија износот на пари што се чуваа во ЕЦБ за 1 трилион евра за помалку од шест месеци, според последното ажурирање на ликвидноста на централната банка. Ова доаѓа откако регулаторот одобри уште една рунда заеми со ниски камати и продолжи да купува обврзници за да ја надомести економската штета предизвикана од пандемијата на коронавирусoт, пишува „Bloomberg“.
Условите за ликвидност станаа исклучително лабави бидејќи ЕЦБ започна да ги наплатува каматните стапки до минус 1% за насочени операции за долгорочно рефинансирање познати како „TLTRO“ за да помогне во закрепнувањето на економијата. Ова значи дека централната банка ефективно плаќа за доделените пари.
Без разлика дали банките акумулираат пари за „црни денови“ или ги позајмуваат за да ја стимулираат економијата, скоро сите пари се чуваат како резерви во централната банка, зголемувајќи го вишокот ликвидност. Вишокот резерви во системот се искачи на 3,085 трилиони евра, според најновите податоци на ЕЦБ.
„Парите не го напуштаат системот“, рече Риши Мишра, аналитичар на „Futures First“.
Вишокот пари веќе ги помести краткорочните каматни стапки во регионот на најниско ниво, намалувајќи го јазот помеѓу тримесечниот „Euribor“ – каматната стапка по која банките можат да позајмуваат едни од други – и ја сврти каматната стапка на „Eonia“ под нулата во јули, за прв пат од 2005-та година наваму.
Каматната стапка на краткорочните депозити во евра, позната како „ЕСТР“, во средата се спушти за 1,4 основни поени до минус 0,57%, соборувајќи го претходното рекордно ниско ниво пред еден месец. Минатата недела, банките во еврозоната зедоа 174,5 милијарди евра заеми за „TLTRO“, додавајќи ги на 1,3 трилиони евра заеми во јуни. Тие, исто така, продадоа долг од 559 милијарди евра на ЕЦБ во рамките на програмата за откуп за време на пандемијата.
Инфлацијата во еврозоната во септември се очекува да покаже нов пад на цените кога податоците ќе бидат објавени во петок, според просечната проценка на економистите анкетирани од „Bloomberg“.
Иако претходните големи зголемувања на готовина во оптек спречуваа пад на потрошувачките цени, според Кристоф Ригер, шеф на стратегијата за каматни стапки во „Commerzbank AG“, ова нема никаква врска со рекордниот износ на вишок резерви.
Според него, ЕЦБ може да каже дека без проток на ликвидност, инфлацијата ќе биде уште помала.
Следната рунда на ултра-евтини заеми ќе изврши само умерен надолен притисок врз каматните стапки, велат аналитичарите на „Goldman Sachs Group Inc.“, кој проценува дека падот е на една основа на „ЕСТР“ и „Eonia“ за секое зголемување на вишокот резерви за 500 милијарди евра.
Пазарите на пари во врска со ова се обложуваат дека ЕЦБ дополнително ќе ја намали каматната стапка на депозитите за 10 основни поени од сегашното рекордно ниско ниво од минус 0,50% до крајот на следната година.
