Велика Британија и Јапонија постигнаа трговски договор. Тој треба да се применува од 1-ви јануари 2021-ва година, објави британското Министерство за трговија во петокот во Лондон.
Првиот договор по напуштањето на Европската унија на почетокот на годината гарантира дека 99% од британскиот извоз во третата по големина економија во светот ќе биде бесцарински.
Договорот, кој се очекува да го зголеми британскиот БДП за 0,07% во споредба со нивото од 2018-та година во следните 15 години, во петокот беше договорен во принцип од министерот за меѓународна трговија Лиз Трус и јапонскиот министер за надворешни работи Тошимитсу Мотеги, се вели во соопштението од британската влада.
Постигнувањето договор со третата по големина економија во светот беше приоритет на британскиот премиер Борис Џонсон, кој побрза да ја покаже својата способност да потпише трговски договори како независна држава – клучен дел од кампањата за „Брегзит“ што тој ја водеше. Велика Британија досега има корист од договорот за слободна трговија меѓу ЕУ и Јапонија и му беше потребен договор за избегнување на тарифи за трговија со азиската земја на крајот на годината.
Трговијата со Јапонија може да порасне за околу 15,2 милијарди фунти (околу 16,5 милијарди евра) една година по договорот, се вели во соопштението.
Дигиталниот договор и договорот за податоци се далеку над одредбите на трговскиот договор на ЕУ со Јапонија и ги поддржуваат британските финтек компании кои работат во азиската земја, објасни Министерството.
Велика Британија ја напушти ЕУ на 31-ви јануари. Моментот на склучување на договорот со Токио е адут во рацете на Џонсон, кому итно му требаше успех во услови на обновени преговори меѓу Лондон и Брисел за договор за слободна трговија по крајот на преодната фаза за „Брегзит“ на крајот на годината. Преговорите нагло се влошија оваа недела, покрај планот на Велика Британија да го прекрши меѓународното право во врска со договорот за разделба. Овој потег ги влоши преговорите и ги зголеми шансите трговскиот договор да не биде постигнат до 31-ви декември, кога Велика Британија ќе ги напушти договорите за транзиција по „Брегзит“.
