Пандемија? „Apple“ објави рекордни приходи и профит за вториот квартал!

„Apple Inc.“ објави многу посилни финансиски резултати од очекуваните за вториот квартал од 2020-та година. За време на карантинот, потрошувачката на електронски уреди ширум светот се зголемила бидејќи многу луѓе беа принудени да работат и да се забавуваат од дома, како резултат на што значително се зголеми продажбата на „iPhone“, „iPad“ и „Mac“, пишува „Bloomberg“.

Акциите на американскиот технолошки гигант се зголемија за 6,3% по завршувањето на официјалната трговска сесија синоќа на скоро 410 долари по акција.

Компанијата исто така објави дека ќе ги подели своите акции во сооднос 4 спрема 1, а новите модели на „iPhone“ ќе бидат објавени неколку недели подоцна од вообичаеното.

Вкупниот приход од фискалниот трет квартал на „Apple“ беше 59,7 милијарди долари, што е рекорд за овој период од годината. На годишна основа, тие се зголемија за 11% и значително ги надминаа прелиминарните прогнози на аналитичарите, кои очекуваа малку повеќе од 52 милијарди американски долари.

Нето-добивката за кварталот изнесува 11 милијарди долари и се зголеми за 12% на годишна основа.

Се чини дека ограничувањата наметнати за време на пандемијата не само што не влијаеле негативно на продажбата, туку дури и ги поддржувале. Милиони луѓе ширум светот решија да купат нови уреди за да останат поврзани со нивните семејства, пријатели и колеги.

„Во време на неизвесност, овие резултати се доказ за важната улога што ја играат нашите производи во животот на луѓето“, рече Тим Кук, извршниот директор на компанијата.