Италијанската енергетска компанија „Eni SpA“ објави загуба во вториот квартал и ја намали својата дивиденда, откако кризата со коронавирус доведе до значително намалување на цената на нафтата, објави „Bloomberg“.
Операциите на компанијата се погодени од намалената побарувачка за сурова нафта и горива, бидејќи земјите ширум светот воведоа мерки за спречување на ширењето на коронавирусот. Потрошувачката падна особено нагло во Италија, првата европска економија која беше погодена од пандемијата.
Прилагодената нето загуба на „Eni“ беше 714 милиони евра во кварталот, во споредба со добивката од 562 милиони евра една година порано, се вели во соопштението на компанијата со седиште во Рим. Аналитичарите очекуваа загуба од 1,11 милијарди евра.
„Eni“ ќе ја намали својата целогодишна дивиденда на 55 центи по акција, во однос на очекувањата од 89 центи за акција во февруари. Одлуката за намалување на плаќањата на акционерите се одразува на сличните потези на „Royal Dutch Shell Plc“ и „Equinor ASA“.
Производството на „Eni“ за кварталот падна на 1,71 милиони барели нафта на ден, додека една година претходно тоа изнесуваше 1,83 милиони барели.
Во април, „Eni“ ја намали својата прогноза за производство, откако објави пад од 94 проценти на добивката во првиот квартал. Еден месец порано, компанијата ги намали плановите за трошење и го откажа планираниот откуп на акции од 400 милиони евра. На крајот на април, компанијата го продлабочи намалувањето на капиталните расходи, предвидувајќи намалување на 2,3 милијарди евра за оваа година, што е за 30% помалку од првично планираното.
