Велика Британија ќе воспостави „воздушни мостови“ кои ќе овозможат патување без карантин кон попопуларните европски одморалишта, пишуваат британските медиуми.
Италија, Шпанија, Германија, Австрија, Турција, Грција, Франција, Белгија, Холандија, Португалија, Гибралтар и Бермуди би требало да бидат на списокот на земји со кои ќе се воспостават „воздушни мостови“, кои ќе бидат објавени во понеделник, пишува The Daily Telegraph и другите медиуми.
Консултантот за туризам Пол Чарлс, кој ја водел кампањата против одлуката на владата да воведе задолжителен 14-дневен карантин за повеќето патници кои доаѓаат во Британија по 8 јуни, изјави дека очекува поблиските дестинации да доминираат во списокот на исклучоци. Очекува тоа да бидат Франција, Италија, Шпанија, Белгија, Ирска, Холандија, Грција и Гибралтар.
„Подолгите дестинации подоцна, можеби во септември, а САД и Латинска Америка веројатно во ноември“, објави на Твитер.
Велика Британија пријави 43.000 смртни случаи поврзани со заразата од новиот коронавирус, што предизвикува респираторна болест COVID-19. Тоа е најмногу во Европа.
