На азиските берзи во вторникот, цените на акциите се зголемија веќе втор ден по ред, бидејќи инвеститорите се надеваат на брзо закрепнување на светската економија, па тензиите помеѓу САД и Кина и економската штета од корона кризата се во втор план.
MSCI индексот на азиско-пацифичките акции, без јапонските, околу 7 часот беше во плус 0,3 проценти, откако вчера скокна повеќе од 2 проценти и го достигна највисокото ниво од почетокот на април.
Притоа, на берзата во Токио, Nikkei индексот зајакна повеќе од 1 процент, додека цените на акциите во Австралија, Хонг Конг, Сингапур и Јужна Кореја пораснаа помеѓу 0,3 и 0,8 проценти. Во Шангај, пак малку паднаа.
Азиските инвеститори беа охрабрени од вчерашниот раст на цената на акциите на Wall Street, и покрај зголемувањето на тензиите помеѓу Вашингтон и Пекинг и масовните протести во САД поради полициското насилство и расизмот.