Франција за прв пат ја зазеде позицијата главна европска дестинација за нови странски инвестиции, оставајќи ги зад себе Велика Британија и Германија, покажа истражувањето во четвртокот на консултантската компанија EY.
Минатата година Франција привлече 1.197 странски инвестициски проекти, што е 17 проценти повеќе отколку во 2018 година, објави EY.
На второ место е Британија со 1.109 проекти, пет проценти повеќе од една година порано. Следува Германија со 971 проекти, непроменет број во однос на претходната година.
Истражувањето на EY во деловниот сектор, спроведено кон крајот на април, исто така, покажа дека поради корона-кризата многу проекти во Франција може да бидат ревидирани.
Две третини од деловните лидери кои учествувале во анкетата очекуваат оваа година да ги ревидираат инвестициските планови поврзани со Франција, а 15 проценти ќе ги одложат до 2021 година. Никој нема намера да ги откаже ниту да додаде нови.
За привлекување странски инвеститори, претседателот Емануел Макрон ги олесни законите за вработување и отпуштања, ја преобликува шемата за даночни кредити во трајно ниски корпоративни даноци и воведе рамна даночна стапка од 30 проценти за инвеститори.
Се покажа дека нивниот ентузијазам не е задушен од бранот на насилни сведочења против владините реформи во 2018 и 2019 година, ни неделните штрајкови на превозниците поради пензиската реформа кон крајот на минатата година и почетокот на оваа година.
Од избувнувањето на епидемијата од коронавирусот, владата на Макрон го насочи својот фокус кон ублажување на економската штета, а закрепнувањето се обидува да го поддржи со охрабрување на домашните компании да ги вратат производните активности дома.
