Можноста Грција да ја развие својата верзија на „Силиконскатa долина“ стана поверојатна, бидејќи државата ја врати сопственоста над земјиштето од 76 хектари во Солун, каде што е предвиден развој на технолошки парк од четврта генерација, пишува атинскиот весник „Катимерини“.
Станува збор за земјиште покрај брегот од 750 метри во Солунскиот залив, кое некогаш припаѓало на државната радио-телевизија ERT, а во 2013 година е пренесено во државниот фонд за приватизација.
Меѓутоа, пред неколку години, стратегијата за користење на тоа земјиште беше променета и беше решено да се врати на државата, за да може да се предаде на „Александровата зона за иновации“. Тоа претставува административно тело за организација и промоција на иновативната зона „Солун“, која треба да развие технолошки парк во тој грчки град.
Пред новиот инвеститор да започне со изградба, ќе мора да ги заврши потребните студии и да обезбеди финансиски средства до крајот на следната година, во спротивно, земјиштето ќе биде вратено на фондот за приватизација.
Проектот претставува инвестиција вредна 50 милиони евра, а парите се собираат преку приватни забави, заеми и донации. Веќе се потрошени 250 илјади евра за студии и бизнис план, изјави за „Катимерини“ претседателот на „Александровата зона за иновации“, Кириакос Луфакис.