Европската инвестициона банка (ЕИБ) ќе им обезбеди на земјите надвор од Европската унија 5,2 милијарди евра во рамките на својот пакет поддршка за решавање на ефектите од пандемијата од COVID-19, се вели во соопштението на финансиската институција.
Средствата се дел од поширокиот пакет помош за 100 земји надвор од ЕУ, кои ги најави Европската унија и нејзиниот “Тим Европа”, а поддржани се гаранциите од буџетот на Унијата.
Поддршката на земјите ќе биде овозможена по итна постапка, а целта е зачувување на работните места и животниот стандард на граѓаните кои работат во секторите кои се најтешко погодени од негативните економски и социјални последици од пандемијата, и ЕИБ планира и дополнително долгорочно финансирање на здравствените и економските сектори.
Пакетот поддршка на ЕИБ, на земјите од Западен Балкан исто така ќе биде достапен по забрзана постапка и прилагоден на специфичните потреби на различни сектори на економијата, а на земјите од регионот ќе им биде достапна и техничка поддршка и експертиза за брза подготовка на инвестициските проекти.
Групацијата ЕИБ најави и дека од овие средства ќе го забрза издавањето на веќе одобрените средства за финансирање на проекти во здравството, како во јавниот, така и во приватниот сектор.
