Регулираните цени на горивата на бензинските пумпи во Словенија од вторникот во 00:00 часот се најниски во последните 11 години, па за литар бензин 95 октани треба да платите 1,029 евра, а за дизел гориво 1,017 евра.
Владата на дописната седница на 7 април објави дека ги намалила акцизите кои државата ги пресметува за гориво и сочинуваат значаен дел од конечната малопродажна цена.
Но, на падот на цените на горивата во последно време допринесува падот на цената на нафтата на меѓународниот пазар, и намалената побарувачка како резултат на пандемијата од коронавирусот и рестрикциите во економијата, како и сообраќајот со моторни возила.
Ваквите ниски цени во Словенија се однесуваат само на бензинските пумпи надвор од мрежата на автопати и државни патишта, затоа што цените на пумпите по автопатите и државните патишта остануваат нерегулирани, па ги одредуваат нивните сопственици.
Станува збор за најниски цени на горивата во Словенија од средината на 2009 година.