Словенечката централна банка проценува дека поради пандемијата COVID-19, словенечкиот бруто домашен производ би можел да падне на годишно ниво помеѓу 6 и 16 проценти, со што негативното влијание на пандемијата би бил многу поголем отколку што го имала глобалната финансиска криза во 2008 година.
Во големата глобална финансиска криза, словенечкиот БДП поради големата зависност од извозот и надворешната трговија, паднал за осум проценти, а поради кризата падот на економската активност и вработувањето траеле неколку години.
Сега се очекува пад на потрошувачката која би можело да изнесува помеѓу 2,4 и 9 проценти, при што посебно би можел да биде изразен во секторите како што се трговија на мало, туризам и угостителство, транспорт, култура и рекреација. Најголем пад на потрошувачката се очекува во вториот квартал од оваа година.
На пазарот на труд, пак се очекува намалување на бројот на вработените помеѓу 1,8 и 4,7 проценти, во исто време зголемување на стапката на невработеност, која на годишно ниво би можела да се зголеми.
Банката на Словенија предупредува дека вистинскиот пад на БДП, потрошувачката и вработеноста многу ќе зависи од ефективноста на мерките за ублажување на коронакризата, која владата низ т.н. мега закон го упатила во парламентарна процедура, а парламентот за него треба да гласа оваа недела.
Станува збор за финансиски пакет тежок 3 милијарди евра со цел ублажување на негативните економски и социјални последици од пандемијата коронавирус, кој би важел до 30 мај, со можност за дополнително продолжување за уште еден месец.
