Реномираниот светски економист Џефри Сакс вели дека коронавирусот во Њујорк предизвика последици како разорен земјотрес или цунами, а дека кризата во светот по пандемијата ќе трае најмалку две години.
Тој вели дека Њујорк денес е епицентарот на епидемијата. Болниците се преполни, луѓето умираат, нема доволно опрема, градот е затворен. Особено го загрижува дека Соединетите држави и Њујорк воопшто не се подготвени, и додека луѓето ја разбраа големината на катастрофата, вирусот многу се прошири.
Сакс вели дека падот на бруто домашниот производ како резултат на кризата предизвикана од пандемијата ќе биде “најстрмоглавиот забележан во поновата историја“, бидејќи во вториот квартал на 2020 година ќе изнесува помеѓу 10 и 30 проценти.
„Падот поради прекинот на трговијата и проблемите со снабдувањето најверојатно ќе трае и во следните две години. Државите можеби ќе излезат од карантин во наредните 60 до 90 дена, но нормалноста нема да се врати барем уште една или две години. Меѓутоа, нема едноставно да се вратиме во времето пред пандемијата, но ќе се воспостави нова нормална состојба“, изјави тој.
Тој посочува дека вознемирувањата кои во моментот се случуваат се сериозни и трајни, а дека сиромашните држави тешко ќе ја надокнадат штетата на краток рок и дека животот нема да биде ист како пред пандемијата.
„Економијата ќе се реконструира, повеќе работии трговии ќе се вршат преку интернет, а бројот на деловни патување сигурно ќе биде намален“, изјави Сакс.
