Германскиот технолошки гигант Bosch објави дека развил брз тест за коронавирус, a Siemens најави воспоставување на мрежа за 3D печатење на делови од медицинските уреди.
Целосно автоматизираниот тест дава резултати за помалку од два и пол часа, а наменет е за употреба во болници, лекарски ординации и други здравствени установи, стои во соопштението на компанијата објавено во четвртокот.
Има “точност поголема од 95 проценти” и ги задоволува стандардите за квалитет на Светската здравствена организација (WHO), тврдат во Bosch.
Во моментов, за резултати од тестирање на коронавирус во Германија чекаат четири до пет часа, а поради екстерните лаборатории кои го прават клучниот дел од работата понекогаш дури и подолго, според институтот Роберт Кох.
Тестот на Bosch би требало да овозможи целата постапка да се изврши во болници или клиники.
Компанијата го разви во рок од шест недели, во Германија би требало да биде достапен од април, а подоцна и во други земји.
Според портпаролката на Bosch, сè уште се во очекување одобренијата од властите иако некои лаборатории во одредени околности веќе можат да добијат пристап до технологијата.
Сè уште не е јасно колку ќе чини, додава dpa.
Нацрт тестот вклучува уреди за Vivalytic анализа во која се вметнува брис складиран во касета.
И индустрискиот конгломерат Siemens во четвртокот се приклучи во борбата против коронавирусот, најавувајќи лансирање на мрежа на 3D принтери кои ќе ги поврзат лекарите со компаниите поради 3D печатење на медицинска опрема.
Мрежата би требало да го намали остриот недостаток на опрема како респиратори, соопшти компанијата. Siemens обезбеди 120 принтери за потреби поврзани со короната, изјави портпаролката, додавајќи дека се очекува дека на иницијативата ќе се придружат и други компании.
Коментари