Германија има намера на долг рок да профитира од продажбата на акции во компании кои ќе се национализираат за време на епидемијата за да го обезбеди нивниот опстанок, изјави во четвртокот германскиот министер за финансии Олаф Шолц.
Најголемата економија во Европа сигурно поради пандемијата ќе падне во рецесија, а владата на канцеларката Ангела Меркел најави мерки за ублажување на влијанието врз работниците и компаниите.
Мерките вклучуваат и купување акции во компании за да ги заштити.
Министерот за финансии посочи дека државата не сака да ги задржи акциите повеќе од потребното и дека ќе ги ограничи аквизициите за најекстремните случаи.
„Кога ситуацијата ќе се нормализира, ќе ги продадеме. Очекуваме економското закрепнување да биде толку силно што делумно ќе ги продадеме со профит и со тоа ќе ги покриеме загубите во другите области“, изјави тој.
„Друга опција е корпоративни обврзници кои фондовите можат да ги преземат за поддршка на компаниите и деловните активности“, додаде Шолц.
Долниот дом на германскиот парламент во средата усвои огромен стимулативен пакет, суспендирајќи ја уставната одредба со која се забранува задолжување.
Пакетот вклучува 100 милијарди евра за фонд кој ќе може директно да купува акции во компании и ист износ на кредит од развојната банка KfW за компании погодени од епидемијата.
