Европскиот комесар за проширување, Оливер Вархели, во средата објави дека Европската унија испраќа 38 милиони евра итна помош на здравствениот сектор на Западен Балкан.
„Предвидено е и релоцирање на повеќе од 373 милиони евра за социо-економско закрепнување“, напиша тој на својот профил на Твитер.
Исто така, изјави дека во писмото кое го проследил до сите премиери на земјите од Западен Балкан, потврдил дека стои заедно со регионот во борбата против болеста COVID-19.
Вархели во вторникот на новинарско прашање за начинот на кој ЕУ може да му помогне на регионот или да го вклучи Западен Балкан во заеднички европски одговор на пандемијата коронавирус, порача дека Европската комисија работи на повеќе правци за помош.
„Веќе мобилизиравме фондови во висина од 30 милиони евра за земјите од Западен Балкан за да можат брзо да ја добијат неопходната медицинска опрема која им е потребна за борба против кризата. Исто така, разгледуваме како да ги пренасочиме фондовите од страна на ЕУ за да им помогнеме на земјите од регионот во врска со економската страна на кризата“, изјави Вархели.
