Две бебиња во Србија се меѓу 303 заболени од коронавирус во оваа земја, пренесуваат српските медиуми.
Бебе старо 28 недели е заразено со коронавирус во Србија, изјави директорот на клиниката „Драгиша Мишовиќ“, доктор Владимир Ѓукиќ.
Тој во емисија на ТВ „Пинк“ рекол дека меѓу заболените во Србија има многу млади.
„Имаме бебе од 28 недели, родители, татко и син, син и мајка, цели семејства, сите се загрозени, единствена превентива е целосна изолација“, рекол тој.
„Има многу млади. За жал, не се сите во идеална состојба, но навистина постојат сите предуслови да се згрижат квалитетно и се надевам дека ќе бидат во ред“, рекол директорот.
Освен бебето од 28 недели, во саботата на клиниката било примено бебе што имало 27 дена. Најверојатно, бебето го добило вирусот од чичко на таткото, кој е заболен од коронавирус.
„Бебето е стабилно и оздравува. Што се однесува до неговата општа состојба, уште сега би можело да биде пуштено дома, но поради возраста, тоа е задржано“, рекле лекарите.
