Во понеделник истекува рокот за аплицирање за годинашната награда на Светскиот самит за мобилни содржини која како иницијатива на Обединетите нации ги претставува дигиталните содржини значајни за глобалното општество.
Министерството за информатичко општество и администрација денеска ги повика сите заинтересирани да ги испратат своите електронски содржини до националниот експерт за Македонија, Бардил Јашари. Тој ги номинира и поднесува осумте најдобри, односно по еден од секоја натпреварувачка категорија.
Повеќе детали и информации, заинтересираните може да добијат на веб страниците http://www.wsa.org.mk и http://www.wsis-award.org.
За наградата на Светскиот самит за мобилни содржини се одбираат најдобрите решенија за е – содржини од повеќе од 160 земји членки на Обединетите Нации и тие се промовираат на глобално ниво на Светскиот самит за дигитални содржини.
По периодот за предселекција на национално ниво, жири составено од еминентни експерти ќе се сретне во Талин, Естонија, за да ги евалуира поднесените проекти и ќе одбере 40 најдобри решенија, односно, по пет од секоја натпреварувачка категорија. Во ова жири, Република Македонија ќе биде претставена од заменик министерот за информатичко општество и администрација, Марта Арсовска-Томовска.
Оваа година, Светскиот конгрес за мобилни апликации ќе биде домаќин на најкреативните производители на е – содржини, а ќе се одржи во Коломбо, Шри Ланка од 23 до 25 октомври.
