Германците со нови правила удрија по системот на Apple за мобилни плаќања

Германија донесе ново законодавство кое ќе го присили Apple да го отвори својот мобилен платен систем на ривалите даватели на услуги.

Банките во Германија и соседна Швајцарија веќе некое време настојуваат да го принудат Apple да го отвори својот љубоморно чуван NFC интерфејс, тврдејќи дека ги дискриминира домашните системи за мобилни плаќања. Претходните напори за Apple да ја отвори својата инфраструктура во Австралија, не успеаа да поминат по жестоката битка помеѓу американскиот гигант за потрошувачка електроника и петте најголеми банки во земјата.

Германскиот закон не го наведува конкретно Apple, туку наместо тоа, бара „операторите за електронска парична инфраструктура“ да нудат пристап на ривалите по разумна цена. Предвидено е стапување на сила следната година.

Apple ги осуди плановите како напад врз приватноста и безбедноста на корисниците.

„Изненадени сме што ненадејно е воведено ова законодавство“, наведе Apple во соопштението. „Се плашиме дека нацрт законот може да биде штетен за корисничкото искуство, заштитата на податоците и безбедноста на финансиските информации“.