Договорот за излез на Велика Британија од членството во Европската Унија е на дофат, но сè уште ништо не е загарантирано, изјави денеска францускиот државен секретар за европски и надворешни работи Жан-Батист Лемоан, неколку часа пред почетокот на дводневниот самит на лидерите на ЕУ во Брисел.
„Се чини дека договорот е на дофат на рака, но сè уште не е загарантирано. Се надеваме дека ќе биде одлично ако договорот се постигне во наредните часови“, изјави Лемоан.
Преговарачот на ЕУ за Брегзит, Мишел Барние, изјави доцна синоќа дека е постигнат добар напредок во преговорите и додаде дека „продолжува работата“ за постигнување договор.
Во Брисел денеска започнува дводневниот самит на ЕУ, на кои една од главните теми е Брегзит предвиден за 31 октомври.
