Соединетите држави ставија на “црна листа” 28 кинески државни и приватни организации и компании наводно за нивната поврзаност со насилства врз етничките ујгури во кинеската провинција Синџанг.
Тие сега се на таканаречениот „список на ентитети“ што им забранува да купуваат производи од американски компании без одобрение од Вашингтон.
Меѓу забранетите се и владини агенции, вклучително и технолошки компании специјализирани за опрема за надзор, пренесува BBC.
Не е прв пат Вашингтон да воведува трговски забрани за кинеските компании, од кои најпознат е случајот со телекомуникацискиот гигант Huawei, кој се наоѓа на листата поради безбедносни прашања.
Причината за наметнување на забраната е што овие организации се „вклучени во кршење на човековите права и злоупотреба“.
Организациите за човекови права веруваат дека Пекинг ги прогонува претежно муслиманските ујгури во таканаречените „кампови за превоспитување“, при што Кина наведува дека „се бори против екстремизмот“.
На списокот се наоѓаат околу 19 владини агенции, вклучително и Провинциското биро за јавна безбедност.
Истите, според BBC, се компании за надзор, како што се „Хиквижон“, „Дахуа“ и „Мегви технолоџи“, кои се специјализирани за технологија за препознавање лица.
САД и Кина се среде трговска војна.
Групите за човекови права и ООН велат дека Кина опколила и затворала повеќе од милион ујгури и други национални малцинства во логорите за притвор, принудени да се откажат од исламот, да зборуваат само мандарински кинески и да учат послушност кон комунистичката влада.
Кина го негира тоа и вели дека овие луѓе одат во „центри за стручна обука“ за да можат да најдат работа и да се интегрираат во кинеското општество, сето тоа во име на спречување на тероризам.
