Генералниот секретар на Обединетите нации Антонио Гутерес предупредува дека светската организација се соочува со „најголемата финансиска криза“ во последните десет години.
Шеесет и четири од 193-те членки не успеаа да ги исплатат своите годишни обврски, вклучително и САД.
Освен Америка своите обврски не ги исполнија ни Бразил, Иран, Израел, Мексико, Јужна Кореја, Саудиска Арабија и Уругвај. Поради тоа, првиот човек на светската организација им пиша на сите членови.
„Овој месец ќе имаме најголем дефицит на деценијата. Ризикуваме да завршиме со мировните операции, да ги испразниме резервите и во ноември да влеземе без доволно пари за покривање на платните списоци“, порача Гутерес.
Земјите-членки на Обединетите нации до крајот на септември платија само 70 проценти од своите обврски.
Соединетите држави за оваа година должат 674 милиони долари, а од претходните 381 милиони. За операциите кои се завршени, Вашингтон не уплати 255 милиони долари.
