Инвеститор од Калифорнија сака да ја купи иконата на Њујорк, зградата „Empire State Building“. Рувен Кан заедно со источноевропските партнери предложил понуда од 2.25 милијарди долари.
Неговата понуда е веќе четврта и со тоа ја заостри битката при купувањето на њујоршкото обележје.
Компанијата „Malkin Holdings“ која управува со 102-катната зграда, доби две понуди од 2 и 2,1 милијарди долари. Првата беше од Рубин Шрон кој поседува дел од зградата „Woolworth Building“, а втората е од мистериозен купувач од Блискиот Исток. Ова се случи откако „Malkin Holdings“ презеде план за вклучување на „Empire State Building“ и 17 други имоти што ги поседува во труст за инвестиции во недвижности, наречен „Empire State Realty Trust Inc“, кој ќе може да се тргува на њујоршката берза.
Малку потоа следеше уште една понуда, при што „Thor Equities LLC“ понуди 2.1 милијарди долари во кеш за зградата.
Според последните проценки историскиот облакодер „Empire State Building“ се проценува на околу 2.53 милијарди долари.
