Лидерите на најразвиените земји на Г7 самитот во Франција за глобалната економија

Претседателот на САД, Доналд Трамп и другите лидери на најразвиените земји во светот ќе го отворат годинешниот самит на групата седум (Г7) во Бијариц, Франција, на кој разговорите ќе се фокусираат на глобалната економија.

Трамп и уште шестмина лидери на Групата 7 почнуваат состаноци во сабота во Бијариц и ќе разговараат до понеделник.

Франција во 2019 година претседаваше со Г7 кој ги вклучува уште и Британија, Канада, Германија, Италија и Јапонија.

На темата на состанокот Франција ја идентификуваше борбата против нееднаквоста.

Бијариц и неговата околина го штитат 13.000 полицајци и жандарми, а се подготвува голем собир на противници на ваквите самити, пренесува France-Press.

Според Елисејската палата, Бијариц очекува 2.000 акредитирани новинари и 3.000 членови на делегацијата, што е околу 25.000 ноќевања во хотелите во таа област.

Градот е блокиран од четвртокот вечерта, две многу строги зони се ограничени во центарот на градот, црвена и сина, каде што се влегува со дозвола, предизвикувајќи потешкотии на жителите и трговците.

Светските лидери ќе се состанат на неформална вечера во сабота каде се очекува да разговараат за надворешната политика и безбедносните прашања пред повеќе официјални работни состаноци во недела и понеделник.

На барање на Трамп во дневниот ред е вклучен разговор за глобалната економија, соопштија официјални претставници на Белата куќа, објави AP.

Мрачниот глобален економски поглед е делумно резултат на борбениот став на Трамп за трговијата со Кина и други земји на кои им воведе царини или се заканува дека ќе ги воведе.

Трамп инсистира на тоа дека американската економија е силна и покрај стравувањата дека рецесија е на повидок.

Во исто време глобалниот економски раст е забавен од слабоста во Германија, најголемата економија во Европа, и забавувањето на растот во Кина, која е во трговски конфликт со САД.

Се очекува Трамп на маргините на состанокот да разговара со неколку светски лидери меѓу кои и францускиот претседател Емануел Макрон, јапонскиот премиер Шинзо Абе, индискиот премиер Нарендра Моди, германската канцеларка Ангела Меркел и канадскиот премиер Џастин Трудо, објави AP.

Новиот британски премиер Борис Џонсон исто така ќе се сретне со Трамп.