Компаниите „General Motors“ (GM) и „Honda“ ќе ги здружат силите на полето на производство на возила кои како гориво користат водород, а кои на купувачите ќе им бидат достапни до 2020-та година.
Партнерството има за цел да ги реши двата најголеми проблеми со кои е соочена комерцијалната изводливост на овој вид на возила, а тоа се пред се големите трошоци за производство на водород и недостатокот од пумпи за снабдување на возилата со водород.
„ „Honda“ и „GM“ сакаат да го забрзаат влезот на пазарот на најновите технологии“, изјави директорот на „Hondа“, Таканобу Ито за време на потпишувањето на договорот.
Инженерите на двете компании заедно ќе работат на развивање на следната генерација на технологии на горливи ќелии, делејќи ги своите претходни и идни знаења во заедничките истражувачки центри во Мичиген и Јапонија.
Една од клучните цели на овие компании е намалувањето на трошоците за развојот по пат на соработка со добавувачите кои би ги произведувале стандардните и помалку скапи компоненти.
„Honda“ и „GM“ исто така ќе соработуваат со своите влади и со компаниите кои се сопственици на пумпи за гориво, се со цел да се развијат неопходните инфраструктури за овој вид на возила.
Двете компании веќе подолго време работат на развој на возила кои ќе се движат на водород, како што се концептите „HydroGen“ на „GM“ или „Honda FCX Clarity“.
Автомобилите кои за погон користат водорот не емитуваат никакви штетни гасови, а единствен продукт од согорувањата е водената пареа.
