Генералниот директор на „JAT“ Велибор Вукашиновиќ денес изјави дека експертите од „Etihad“ интензивно го анализираат работењето на неговата компанија.
„Експертите од „Etihad“ ги интензивираа активности во „JAT“, по потпишувањето на Меморандумот за разбирање. Еден тим од авиокомпанијата од Обединетите Арапски Емирати е постојано во „JAT“, изјави тој.
Вукашиновиќ изјави дека „JAT“ за одржување на сообраќајот користи 11 авиони, истакнувајќи дека полека се приближува кон бројката од 14 авиони која е оптимална за работа преку летото.
Владата на Србија и „Etihad“ на 17 јуни оваа година потпишаа Меморандум за рабирање, со цел да ги унапредат разговорите за можното инвестирање на „Etihad“ во „JAT“.
„Etihad“ и „JAT“ на 15 април потпишаа договор за соработка преку заеднички летови и продажба на билети, а „Etihad“ на основа на тој документ на 15 јуни воведе секојдневен лет на линијата помеѓу Белград и Абу Даби.
Според оценката на Вукашиновиќ, Белград ќе стане регионален центар благодарение на партнерството на „Etihad“ и „JAT“, пренесува агенцијата Франс Прес.
