Кина објави дека нема да потпише никаков трговски договор со САД ако во него не биде вклучено целосно укинувањето на царините за кинеската стока кои ги воведе владата на претседателот Доналд Трамп.
Претставниците на двете најголеми светски економии “одржуваат постојано комуникација”, изјавил за новинарите портпаролот на кинеското министерство за трговија Гао Фенг.
Претседателите на двете земји, Доналд Трамп и Си Џипинг, во саботата се договориле за прекин на трговската војна, за време на самитот на Г20 во Осака и повторно продолжување на преговорите.
“Едностраното американско воведување на царини на кинескиот извоз во САД е почетна точка за трговски недоразбирања. Ако се постигне договор, тие царини мораат да бидат целосно укинати”, изјавил Гао.
САД и Кина од минатата година влегоа во непредвидлива трговска војна и меѓусебно наметнаа царини.
Владата на Трамп воведе царини од 25 проценти на 250 милијарди американски долари увоз од Кина.
Претседателот на САД за време на состанокот во Осака ветил дека нема да воведе нови царини.
