Тројното зголемување на побарувачката за песок во текот на последните 20 години поради зголемувањето на бројот населението, урбанизацијата и изградбата придонело за ерозија на плажите, поплави и суши, предупреди Програмата на Обединетите нации за заштита на околината (UNEP) во новиот извештај кој е објавен денеска.
UNEP во извештајот повикува на повторно размислување за употребата на песокот – после водата најексплоатиран ресурс од страна на индустријата, владите и јавноста.
Во извештајот се додава дека побарувачката за песок и чакал изнесува 40-50 милијарди тони годишно и укажува на потребата за зачувување, рециклирање и потрага по алтернативи, како што се струготини.
“Не размислуваме за тоа како ние користиме песок, бидејќи мислиме: ова е само песок”, изјавил директорот на програмата која UNEP ја спроведува со Универзитетот во Женева, Паскал Педуци.