Кина и ЕУ се согласија на самитот во Брисел да ги зајакнат трговските врски и ветија дека ќе работат на значително подобрување на пристап до пазарот, елиминирање на дискриминаторските барања и практики кои влијаат на странските инвеститори.
Европските водачи Доналд Туск и Жан-Клод Јункер и кинескиот премиер Ли Кечианг разговараа за овие прашања пред да објават дека постигнале напредок во трговските односи.
– Преговорите беа тешки, но на крајот тие беа плодни. Успеавме да се согласиме во врска со нашата заедничка изјава со која се утврдува насоката на нашето партнерство засновано на реципроцитет – рече Туск.
“Влоговите” на годишниот самит беа високи, со двонасочна трговија меѓу ЕУ и Кина во вредност од скоро 575 милијарди евра годишно. ЕУ е најголемиот трговски партнер на Кина.
Лидерите, исто така, разговараа за политиката на Кина за присилување на странските компании да се откажат од интелектуалната сопственост како услов за пристап до нивниот голем и растечки пазар, што е прашање од кое Вашингтон направи централна тема за трговски спор со Пекинг.
Во последната изјава се вели дека двете страни се согласија дека не треба да има присилен трансфер на технологија.
