„Porsche“ на крајот на ноември во Лос Анџелес ја одржа премиерата на целосно новата генерација на моделот „911 Carrera“.
Во најголемиот калифорниски град дебитираше купе верзија, а месец ипол подоцна имам можност да погледнеме како изгледа и кабриолетот.
Дизајнерски сличен на купето, моделот со мек покрив на преклопување во однос на претходникот има одредени подобрувања, кога станува збор за брзината на подигнување/спуштање на платнениот покрив.
Двата процеси траат околу 12 секунди, а покривот може да се подигне или спушти и во возење, но само до 50 km/h. Кога платнениот покрив е спуштен, се активира дефлектор со цел да се намали струењето на воздухот во кабината, а со тоа возењето да биде поудобно.
„Porsche“ новиот „911 Cabriolet“ на стартот на продажбата ќе го понуди само во верзиите „Carrera S“ и „Carrera 4S“.
Двете верзии се опремени со 3.0-литарски „twin-turbo“ мотор со шест цилиндри кој испорачува 450 ks (331 kW) и располага до максимален вртежен момент од 530 Nm.
Моторот е поврзан со новиот осумбрзински менувач со двојно квачило, благодарејќи на кој „Carrera S“ oд 0 дo 100 km/h забрзува за 3,7 секунди и достигнува максимални 306 km/h.
„Carrera 4S“, со погон на сите 4 тркала од место до „стотка“ стигнува за 3,6 секунди, а најголемата брзина изнесува 304 km/h.
Цената на „Porsche 911 Carrera S Cabriolet“ во САД започнува од 126.100 долари, a пак верзијата „4S“ ќе чини од 133.400 долари.
