Вакциналните пунтови во поликлиниките „Букурешт“, „Бит-пазар“ и „Јане Сандански“, викендов, на 5 и 6 јануари, ќе работат во две смени, во периодот од 7:30 до 19 часот. В понеделник, на 7 јануари 2019 година, овие пунктови ќе работат само прва смена, од 7:30 до 13:00 часот, соопшти Министерството за здравство.
Од таму информираат дека денеска до 15 часот вакцинирани се вкупно 939 деца со МРП-вакцина. Во моментов нема нови потврдени случаи на новозаболени лица од морбили (мали сипаници). Од Министерството велат дека МРП-вакцината е висококвалитетна и ефективна, а производител е GlaxoSmithKline од Белгија.
„Апелираме до сите родители да ги вакцинираат децата со МРП вакцина. Потсетуваме дека сè уште е на сила наредбата дека децата, кои се невакцинирани нема да бидат примени во детските градинки, со цел да се спречи ширењето на епидемијата прогласена во Скопје. Родителите кои со своите деца ќе одат во поликлиниките на вакцинација имаат право да го проверат производителот и рокот на траење на вакцината пред да ги вакцинираат“, велат од Министерството.
