Платите на вработените во Клиничкиот центар ќе се зголемат од 5 до 10 отсто

Синдикатот на Клиничкиот центар информира дека успешно завршиле преговорите за покачување на платите на вработените во кампусот клиники „Мајка Тереза“ во Скопје.

По средбата со премиерот, Зоран Заев, и министерот за здравство, Венко Филипче, тие велат дека е изнајдено заедничко прифатливо решение во врска со покачувањето на платите на вработените во кампусот клиники „Мајка Тереза“ во Скопје.

„Крајниот резултат од преговорите за покачувањето на платите е следниот: доктори специјалисти и наставно-научен кадар – 10 отсто, доктори на општа медицина и доктори на државна специјализација вработени во Клиничкиот центар – 5 отсто, здравствени работници со средна, виша и висока стручна спрема (медицински сестри, акушерки, медицински лаборанти, радиолошки технолози и сл.) – 8 отсто и болничари – транспортери и останат помошно-технички персонал – 8 отсто. Овие покачувања на основната плата ќе се применуваат со јануарската плата од 2019 година.

За административниот персонал вработен во Клиничкиот центар е предвидено покачување на платите од 5 отсто, кое ќе се исплатува од септември 2019 година. Притоа е договорено административниот персонал како посебно обучен за потребите на јавното здравство да остане и понатаму во рамките на кампусот клиники „Мајка Тереза“ во Скопје, информира Синдикатот на Клиничкиот центар – Скопје.