Велика Британија би можела да падне од петто на седмо место на листата на најголеми светски економии следната година по напуштањето на Европската унија.
Ова е прогноза од експертите на консултантската фирма “PricewaterhouseCoopers” (PwC).
Според нивното истражување, Индија и Франција би можеле да ја истиснат Велика Британија од петтото место, а според новиот економски распоред Индија ќе биде петта, а Франција ќе се најде на шесто место на најголемите економии во светот.
PwC предвидува дека во 2019 година британскиот економски раст ќе изнесува 1,6 отсто, ако земјата успее без големи последици да го надминување шокот од излегувањето од ЕУ.
Во истото истражување, француската економија се очекува да порасне за 1,7 проценти во 2019 година, додека Индија ќе порасне со стапка од дури 7,6 проценти.
“Во текот на изминатите неколку години Британија и Франција ги менуваа своите позиции на листата на најмоќните економии во светот, но во оваа и следната година, француската економија ќе биде во подобра позиција”, рече економистот на PwC, Мајк Џејк.
