Град Скопје преку соопштение информира дека Јавниот повик за субвенции за чистење на оџаци е продолжен до крајот на годината, односно до 31 декември 2018 година.
„Чистењето на оџакот треба да е извршено од стручно лице вработено во регистрирана фирма за оџачарство. Согласно последните информации, од објавувањето на јавниот повик во Скопје се исчистени 492 оџаци, што е значително зголемување во споредба со претходната година кога беа исчистени 274 оџаци.
Ги повикуваме сите правни и физички лица да се пријавуваат на повикот за доделување на субвенции за чистење на оџаци, независно од периодот кога е оџакот исчистен, во текот на оваа календарска година, со валидна документација“, се наведува во соопштението на Град Скопје.
Јавниот повик за субвенции за чистење на оџаци, како што посочија од Град Скопје е дел од мерките кои градот ги презема со цел намалување на аеро-загадувањето и подобрување на животната средина.
