Европскиот парламент и земјите членки на ЕУ синоќа постигнаа привремена спогодба за буџетската рамка на Унијата за периодот 2014-2020 година.
– Ги завршивме преговорите. Водечкиот преговарач за Парламентот и јас договоривме пакет, што и двајцата ќе го препорачаме (соодветно на ЕП и на Советот на ЕУ), соопшти ирскиот вицепремиер и министер за надворешни работи и трговија Ејман Гилмор, кој ги претставуваше владите на земјите членки на преговорите во Брисел што траеја повеќе од едно деноноќие.
Гилмор соопшти дека ќе побара од министрите за финансии на ЕУ, на својата денешна средба во Луксембург, да го поддржат договорот.
Ратификацијата на спогодбата, меѓутоа, веднаш беше ставена под прашање од главниот преговарач на Групата социјалисти и демократи (ГСД) во ЕП, Ивајло Калфин. Тој јасно кажа дека втората по големина група во Европарламентот не е задоволна од спогодбата.
– Преговорите завршија. Незадоволително за сите. Не можеме да ја потврдиме спогодбата од вечерва, напиша бугарскиот европратеник социјалист на Твитер.
Без поддршката на ГСД не е јасно дали Европскиот парламент ќе ја ратификува спогодбата. Гласањето е закажано за почетокот на следниот месец.
Можно е да бидат неопходни нови преговори меѓу ЕП и владите на земјите членки за да се обезбеди мнозинство за поддршка на спогодбата. Ако тоа не се случи може да биде забавен почетокот на финансирањето на посиромашните региони во ЕУ, засегнати од рецесијата, и на новата иницијатива за борба со нараснатата невработеност на младите.
Европскиот парламент од февруари е во конфликт со Советот на ЕУ, кога националните влади се договорија буџетот на ЕУ во следниот седумгодишен период да биде ограничен до 960 милијарди евра.
