Италија се подготвува да ги намали прогнозите за раст на БДП-то за следната година

Италијанската популистичка влада планира да ја намали прогнозата за растот за наредната година, така што се обидува да ја убеди Европската унија дека нејзините расходни планови и буџетски проекции се веродостојни, соопштува „Bloomberg“.

Италија ќе ја намали прогнозата за БДП-то за 2019-та година до 0,9% или до 1% во однос на сега предвидените 1,5% според вработен во Министерството за финансии, кој побарал да остане анонимен, бидејќи се уште информацијата не е јавна.

Коалицијата во Рим се обидува да ја убеди ЕУ дека планот за трошоците за следната година навистина ќе доведе до буџетски дефицит од 2% од БДП-то. Во исто време, анализата направена од Европската комисија минатиот месец покажува дека дефицитот во реалноста ќе биде блиску до 3%.

Популистичка влада составена од десничарската „Лига“ и антисистемското движење „Пет ѕвезди“, се обидува да избегне санкции од страна на Брисел поради спорниот буџет за 2019-та година пред истекот на крајниот рок на крајот на годината.

Европската комисија побара од Италија да заштеди уште 2,5-3 милијарди евра пред да биде одобрен новиот предлог-буџет на земјата за 2019-та година.

Властите во Рим веќе испратија приспособена верзија на контроверзниот нацрт за следната година во Брисел. Во понеделникот, портпаролот на италијанскиот министер за економија, Џовани Триа, рече дека е во тек договор.

Ревидираниот нацрт-законот на земјата мора да биде доставен до Сенатот и одобрен од двете комори на парламентот. Пропуштањето на крајниот рок би бил политички неповолен за администрацијата, која се обидува да ја зголеми довербата кон неа, а во исто време ќе го одложи извршувањето на скапите предизборни ветувања.