Германската влада ќе издвои дополнителни половина милијарда евра за подобрување на квалитетот на воздухот во градовите што се загадени од автомобилските горива, соопшти германската канцеларка Ангела Меркел.
Сегашниот фонд од милијарда евра ќе биде зголемен на 1,5 милијарда евра.
Меркел ги објави информациите по состанокот во Берлин со претставниците на градовите и населбите.
„Целта на овие разговори беше да се избегне воведување дополнителни забрани за старите дизел-возила во урбаните подрачја, каде што е регистрирано големо загадување“, пренесе ДПА.
Дебатата за квалитетот на воздухот во германските градови е иницирана по скандалот во 2015 година кога компанијата „Фолксваген“ призна дека во своите возила вградила нелегален софтвер што ја прикрива вистинската емисија на штетните гасови.