петок, 9 декември 2022
ПочетнаЕКОНОМИЈАПочна со работа управувачкиот комитет помеѓу македонската и германската влада

Почна со работа управувачкиот комитет помеѓу македонската и германската влада

Во Владата денеска се одржа првиот состанок на мешовитиот управувачки комитет помеѓу владите Македонија и Германија, тело кое е формирано на германска иницијатива, а во насока на интензивирање на соработката на двете земји во економското поле.

Заменик претседателот на Владата задолжен за економски прашања, Кочо Анѓушев, кој е претседавач на телото од македонска страна истакна дека двете земји имаат одлична економска соработка. Тој рече дека Германија е прв трговски партнер на нашата земја и една од ретките со кои оставруваме суфицит во трговската размена.

„Целта на заедничкиот управувачки комитет е да ја забрза и подобри соработката на економско поле помеѓу Македонија и Германија, комуникацијата да биде подиректна, полесна и поедноставно да се надминуваат административните и бирократските бариери. Се разгледуваат три главни теми, од кои првата е зголемување на соработката во индустриското производство, односно да обезбедиме поголем извоз на македонски производи на германскиот пазар, како и поинтензивен трансфер на знаења и технологии од Германија во нашата земја“, рече Анѓушев.

Како што додаде на состанокот се разговарало и за можностите за инвестиции од Германија во Македонија, односно начинот за да се зголеми бројот на инвеститори.

„Втората област на соработката е во изградба на инфраструктура, за проекти со особена важност за квалитетот на живото на граѓаните, каде очекуваме поддршка од финансиските институции од СР Германија. Третата област на соработка е образованието, кадешто ќе се обидеме да ги пренесеме позитивните практики од германската страна за практично образование, образование кое е насочено кон индустријата и создавање на квалификуван кадар за потребите на странските и домашните компании“, нагласи вицепремиерот Анѓушев.

Претседавачот на Комитетот од германска страна, Хелге Толксдорф од Сојузното министерство за екеномија и енергетика на Германија, потенцираше дека фокусот на соработката ќе биде ставен на компаниите кои работат во Македонија, но и на други институции, како КфВ банката, една од водечките банки во регионот, која спроведува проекти во земјата. Поддршка на овој процес ќе дадат германскиот Комитет за економска соработка во Источна Европа и Делегацијата на германското стопанство во Македонија.

„Овој управувачки комитет се вклопува во стратегијата на германската сојузна влада, во однос на соработката со земјите од Западен Балкан. Веќе се организирани четири конференции со земјите од регионот, следува конференцијата во Полска наредната година, на кои што се разговара за агендата за поврзување, но и формирање на регионална економска соработка. Македонија е еден од главните столбови на нашата стратегија, со оглед на фактот дека тука веќе функционираат повеќе успешни германски компании и постои се поголем интерес на германски компании за инвестирање во земјата. Германските инвеститори сакаат да дојдат во земјата, да се задржат младите луѓе во земјата, да се спречи одливот на мозоци од Република Македонија“, додаде Толксдорф.

НАЈНОВИ ВЕСТИ

ХОРОСКОП