Холандската независна канцеларија за буџетско планирање ја намали економската прогноза за 2013 година.
Канцеларијата очекува дека холандската влада во 2014 година ќе забележи јавен дефицит од 3,7 проценти, поголем од границата на Европската унија, која изнесува три проценти.
Централното биро за планирање наведува дека економијата во оваа година ќе потоне за еден процент, во однос на претходната прогноза на негативниот економски раст од 0,5 проценти, пренесува агенцијата АП.
Владата во Хаг ги разгледува новите мерки за намалување на фискалниот дефицит, но не е јасно дали во парламентот ќе наиде на доволна поддршка за мерките да бидат усвоени, бидејќи голем број на економисти сметаат дека новата рунда мерки на штедење ќе донесе повеќе штета отколку корист.
Опозицискиот пратеник Герт Вајлдерс ја обвини владата дека „со буџетските намалувања ја поделила Холандија на неколку парчиња“.
Меѓутоа, министерот за финансии Јерун Дајселблум вели дека новите намалувања се неопходни.
„Времето на лесни решенија одамна помина“, изјави тој.