Министерот за транспорт и врски, Горан Сугарески најави дека новиот експресен пат Штип-Радовиш ќе биде завршен пред предвидениот рок. Тој истакна дека патот ќе биде завршен за околу 2 години.
„Особено сум задоволен од интензитетот со кој се одвиваат градежните работи. Според информациите што ги добивме од надзорот, очекуваме новиот експресен пат да биде завршен пред предвидениот рок. За отприлика 2 години ќе имаме комплетен нов експресен пат од Штип до Радовиш. Како што ветивме пред граѓаните, остануваме посветени на изградба на квалитетна патна мрежа и со силно темпо продолжуваме да градиме нови патишта и да ги реконструираме постоечките. Само во овој дел на Македонија, инвестираме преку 280 милиони евра во патната инфраструктура“ истакна Сугарески.
Директорот на ЈП за државни патишта, Зоран Китанов рече дека во тек е евалуација на понудите за втората фаза од изградбата, делниците од Три Чешми до Штип и од Бучим до Радовиш.
„Набрзо очекувам да потпишеме договор со изведувач. Изградбата на оваа делница каде што сме денес е предвидена да трае 3 години, а изградбата на втората фаза – 2 години. За да немаме отстапки во изградбата двете фази ќе се градат истовремено и за две и пол години очекуваме да имаме комплетно нов експресен пат од Штип до Радовиш“ рече Директорот на
Тој додаде дека се планира и реконструкција на постоечкиот пат од Штип до Радовиш, за што е избран и изведувач.
Изградбата на експерсниот пат Штип-Радовиш се одвива во две фази. Првата фаза е во тек и градежните работи се одвиваат со силно темпо. За втората фаза, делницата од Бучим до Радовиш, во тек е евалуација и набрзо ќе се избере изведувач и ќе се започне со изградба. Вкупната вредност на инвестицијата изнесува преку 47 милиони евра, соопшти Министерството за транспорт и врски.
