Од Министерството за транспорт и врски се огласија во однос на информациите објавени на дел од веб-порталите, а се однесуваат на укинување на железничката линија Белград – Солун.
Тие велат дека во неколку наврати имале средби со владини институции и железнички компании од Србија и Грција, но дека било констатирано дека нема економска исплатливост за одржување на линијата.
„Во изминатиот период, Владата на Република Македонија преку Министерството за транспорт и врски и МЖ Транспорт – АД Скопје, во неколку наврати иницираа средби со релевантните владини институции и железнички компании од Република Србија и Грција, на кои средби се бараа алтернативни решенија за да не дојде до укинување на железничката линија Белград – Солун. На сите тие средби, од страна на српските и грчките железници беше потенцирано дека единствена причина за укинување на оваа линија е непостоење на економска исплатливост за нејзино оддржување“, велат од Министерството.
Од таму додаваат дека ниту Министерството за транспорт и врски ниту МЖ Транспорт -АД Скопје имаат можност, ниту надлежност да влијаат врз деловната политика на националните железнички компании во Република Србија и Грција.
Од тие причини, Министерството за транспорт и врски и МЖ Транспорт -АД Скопје остануваат посветени и во наредниот период на изнаоѓање решение со цел да се овозможи меѓународен железнички сообраќај.
